Рэйдавая група ў складзе памочніка ўрача-гігіеніста райЦГіЭ Вольгі Хацкевіч і карэспандэнта газеты наведала магазіны “Хіт! Экспрэс” філіяла ТАА “Еўрагандаль”, якія размешчаны ў межах горада.
Тэма добраўпарадкавання заўсёды займала і займае пачэснае месца на старонках газеты. У раёне праводзяцца суботнікі, камунальная служба прыбірае вуліцы і двары, каб нам і гасцям нашага горада было прыемна прагуляцца. Чытачы пастаянна ўзнімаюць гэтую тэму, хвалююцца, каб было вакол чыста і прыгожа.
Многія лічаць, што прыбіраць вакол сваіх дамоў, арганізацый і прадпрыемстваў, крамаў трэба пачынаць, як сыдзе снег. На самой справе ў зімовы перыяд таксама важна падтрымліваць чысціню там, дзе жывём і працуем.
У раёне наладжана работа па навядзенні парадку і кантролі за яго падтрыманнем. Спецыялісты раённага цэнтра гігіены і эпідэміялогіі рэгулярна праводзяць рэйды, выязджаюць па зваротах жыхароў.
Так, рэйдавая група ў складзе памочніка ўрача-гігіеніста райЦГіЭ Вольгі Хацкевіч і карэспандэнта газеты наведала магазіны “Хіт! Экспрэс” філіяла ТАА “Еўрагандаль”, якія размешчаны ў межах горада.
Першым прыпынкам стала гандлёвая кропка па вуліцы Калініна, 92а (побач з магазінам “Ганна”). Каб падысці да ўваходу, трэба пераадолець пэўныя перашкоды ў выглядзе ледзяной коркі. Пакуль ішла, узгадала пра неабароненыя катэгорыі грамадзян: людзей з інваліднасцю, пенсіянераў, матуль з малымі дзецьмі. Мы можам паслізнуцца і “бразнуцца” на ледзяное люстра. А што тады казаць пра вышэйназваныя катэгорыі?..
Тэрыторыя крамы не ўтрымоўвалася ў чысціні: недакуркі, паперкі і іншае бытавое смецце раскіданы па перыметры. На тэрыторыі магазіна, па-за спецыяльна абсталяванай канструкцыяй, неахайна ажыццяўляецца захоўванне кардонных каробак, поліэтыленавых мяшкоў, металічных стэлажоў на колах з-пад харчовых прадуктаў, што з’яўляецца парушэннем п. 17 Агульных санітарна-эпідэміялагічных патрабаванняў да ўтрымання і эксплуатацыі капітальных пабудоў (будынкаў і збудаванняў).
Такая ж сітуацыя і каля крамы па вуліцы Інтэрнацыянальная, 40. Месца, трэба сказаць, вельмі ажыўленае. Тут заўсёды шмат людзей рознага ўзросту. Часам моладзь сустракаецца каля магазіна, набывае чыпсы і іншыя “модныя” прысмакі, і кампанія рушыць далей.
Аднак гэта не апраўданне! Чысціня павінна быць усё роўна і ў памяшканні, і вакол яго.
Тое ж самае можна сказаць пра пад’язныя шляхі і пешаходную зону каля магазіна, якія не ачышчаны ад наледзі і снегу. Супрацьгалалёдныя мерапрыемствы не праведзены, што з’яўляецца парушэннем п. 7 Санітарных нормаў, правілаў і гігіенічных нарматываў «Гігіенічныя патрабаванні да ўтрымання тэрыторый населеных пунктаў і арганізацый».
Прыгожы будынак крамы “Хіт! Экспрэс” па вуліцы Савецкай, 11, што каля сярэдняй школы №1. Прыгожыя высокія прыступкі, усё абуладкавана, здавалася б, для таго, каб прыемна было наведвальнікам сюды зайсці. Аднак гэта ўражанне знікла, як толькі падышлі бліжэй. Супрацьгалалёдныя меры не выкананы – і гэта паўбяды. Пандус уяўляе сабой сапраўдную ледзяную горку ды яшчэ з трамплінам са снегу. Чалавек з інваліднасцю, якому патрэбны гэтыя сродкі, зразумела, пройдзе міма крамы.
На тэрыторыі, па-за спецыяльна абсталяванай канструкцыяй, ажыццяўлялася неўпарадкаванае захоўванне кардонных каробак, поліэтыленавых мяшкоў, металічных стэлажоў на колах з-пад харчовых прадуктаў.
Пры наведванні крамы па вуліцы Полацкі тракт, 16, што ў раёне Пясчанка, візуальна тэрыторыя ўтрымлівалася ў здавальняючым санітарным стане, аднак на тэрыторыі магазіна, зноў жа, па-за спецыяльна абсталяванай канструкцыяй, ажыццяўлялася захоўванне кардонных каробак, поліэтыленавых мяшкоў, металічных стэлажоў на колах з-пад харчовых прадуктаў. Тэрыторыя крамы не прыбрана ад бытавога смецця, недакуркаў.
Па ўсіх фактах парушэнняў заканадаўства ў галіне санітарна-эпідэміялагічнага дабрабыту насельніцтва ў адрас суб’ектаў накіраваны рэкамендацыі па ліквідацыі недахопаў. Наглядныя мерапрыемствы ў гэтым напрамку будуць працягваюцца.
На заканчэнне хочацца, зноў жа, звярнуцца да жыхароў. Дапамагчы ў добраўпарадкаванні нашага роднага краю можа кожны. Галоўнае – каб было жаданне. І для гэтага не абавязкова браць у рукі нейкі інструмент, дастаткова проста данесці пакет са смеццем да кантэйнера, паставіць на балконе попельніцу або кінуць паперку ў скрыню.
Так, разумею, калі перапоўнена сметніца і побач шмат паперак і пакетаў. Аднак часам зусім іншая карціна: сметніца пустая, а вакол недакуркі, пластыкавыя бутэлькі і іншае.
Лепельшчына — наш агульны дом, і толькі ад нас залежыць, якім ён будзе!
Наталля Храпавіцкая.
