У аддзяленні кругласутачнага знаходжання для грамадзян пажылога ўзросту «Святліца» ў аграгарадку Камень працуе аздараўленчы комплекс «Чароўная лазня».
Што гэта такое, не даводзілася пазнаць, пакуль не пачула водгукі наведвальнікаў гэтага карыснага месца. І гэтыя пазітыўныя думкі данеслі мне жыхары раёна, якім надарылася магчымасць там пабываць. Раней лічыла, што ў гэтай лазні можа мыцца і адпачываць толькі той, хто жыве ў “Святліцы”. На самой справе прыняць душ з вялікім камфортам і пасядзець у саўне мае мангчымасць кожны, і ўсё гэта па прымальнай цане.
Гэты комплекс не толькі для таго, каб памыцца, а яшчэ і выдатная нагода сабрацца разам са сваімі добрымі сябрамі і пагутарыць за кубачкам чаю.
— Як можна заказаць лазню? — пытаюся ў загадчыцы аддзялення Алены Чувілінай.
— Для гэтага дастаткова папярэдне патэлефанаваць нам і абмеркаваць час.
У наш час лазня — не проста месца, дзе можна памыцца, а і свайго роду рытуал. Тэндэнцыі апошняга часу — імкненне да зносін з прыродай. Трэба сказаць, што мясціны тут на самой справе вельмі прыгожыя. Выдатная, дагледжаная тэрыторыя, чыстае паветра, дзякуючы вялікай колькасці дрэваў. У летні перыяд можна пасядзець на ўтульных лаўках на свежым паветры. Каля лазні пасаджана шмат кустоў, летам шмат кветак.
Традыцыйная лазня становіцца месцам адпачынку, ператвараецца ў аздараўленчы комплекс. Пры аддзяленні кругласутачнага знаходжання працуе менавіта такая лазня — сучасная, з цэнтральным ацяпленнем і печчу-каменкай. Складаецца яна з чатырох зон: парыльні, мыечнай з душам (на пяць-шэсць чалавек), раздзявальні і пакоя адпачынку для гутарак за кубкам гарбаты.
Калі адчыніла дзверы, нават не думала, што лазня такая прасторная. А мне здаецца, што там і дзесяць наведвальнікаў будуць адчуваць сябе камфортна. Пачуўся прыемны пах венікаў, якія вісяць на сцяне. Адразу захацелася ў пахмурны дзень пагрэцца ў лазеньцы. Прыгожая плітка на падлозе, сцены абабіты вагонкай — усё зроблена па-сучаснаму, з карысцю для здароўя і ўтульна. У раздзявальні — умывальнік, вешалкі і лаўкі. Плошча — хоць танцуй. Прадугледжана і прыбіральня. Аднак, напэўна, найбольшая зручнасць у тым, што можна не толькі памыцца і адпачыць, а за гэты час яшчэ і памыць бялізну, бо ў памяшканні ўстаноўлена пральная машына-аўтамат. Лічу, што гэтая паслуга за невялікую плату ідэальна падыходзіць як для адзінокага грамадзяніна, так і сям’і.
Гарачая пара, пахучы венік, духмяны чай і павольная размова выганяюць хваробы і дадаюць сіл. Калі чалавек хаця б раз памыўся ў лазні, наўрад ці ён забудзе адчуванне лёгкасці, чысціні і асалоды, якіх ніколі не дасягне, наведаўшы душ ці ванную.
Наталля Храпавіцкая.