Рэспубліканскі музычны фестываль «Азярцо» Грамадскага аб’яднання «Беларускае таварыства інвалідаў па зроку» адбыўся 26 мая ў Беларускім дзяржаўным музеі народнай архітэктуры і побыту што знаходзiцца у аг. Азярцо Мiнскага р-на.
Для ўдзелу ў фестывалі з усіх рэгіёнаў краіны з’ехалiся самыя таленавітыя выканаўцы народнай песні, выдатныя музыкі, калектывы мастацкай самадзейнасці, а таксама майстры дэкаратыўна-прыкладнога мастацтва.
У склад дэлегацыі ад Віцебскай вобласці ўвайшлі і Лепельчане — Валянціна Кісель і Дзяніс Аблавушка.
Валянціна Кісель пляце паясы на берда – вядомым са старажытных часоў інструмэньце працы, які нагадвае грэбень. Работы Валянцiны падарожнічаюць па ўсёй Беларусі. Дзянiс Аблавушка пад уласны акампанімент на баяне выканаў беларускаю песню «Бульба».
Праграма пачалася з самай раніцы. Пад апладысменты гледачоў свае таленты дэманстравалі выканаўцы. У гэты час адны наведвальнікі назіралі за прадстаўленнем, а іншыя адправіліся на шпацыр па музеі пад адкрытым небам. А ўжо тут было, на што паглядзець. За дадатковую плату можна было набыць сувеніры ад народных майстроў, наведаць «Беларускую карчму», якая знаходзіцца на тэрыторыі музея.
Мерапрыемствы такога плану не толькі развіваюць творчы патэнцыял удзельнікаў, але і даюць ім магчымасць пагутарыць адзін з адным, абмяняцца назапашаным вопытам і паказаць свае дасягненні.
Кожны ўдзельнік мерапрыемства быў узнагароджаны дыпломам фестывалю і атрымаў памятныя падарункі.