“Вельмі важна знайсці да чалавека падыход…”

Чалавек на сваім месцы

Наталля Смажэўская служыць старшым следчым раённага аддзела Следчага камітэта Рэспублікі Беларусь па Віцебскай вобласці.

-- У нашым калектыве існуе пэўная спецыялізацыя, -- расказвае Наталля Сяргееўна. -- Напрыклад, раскрыццём крадзяжоў займаюцца ўсе супрацоўнікі аддзела, але я вяду справы аб дарожна-транспартных здарэннях, нявыплаце аліментаў, браканьерстве, абавязаных асобах, а таксама асобах, якія зніклі без вестак.

-- Мяркую, што пасля размовы з парушальнікамі закону на душы застаюцца непрыемнае адчуванне, пачуццё незразумелай трывогі і псіхалагічнага ціску. Як вам удаецца пераадольваць гэта?

-- Скажу шчыра, мне рэдка даводзіцца кантактаваць з закаранелымі крымінальнікамі. Найбольш часта я працую з людзьмі, якія сталі ўдзельнікамі дарожна-транспартных здарэнняў, не плацяць аліменты, або рыбаловы, якія з сеткамі выйшлі на вадаём. Такія справы не маюць вялікай, смяротнай пагрозы, як, напрыклад, забойствы ці рэкет. Як правіла, мне са сваімі суразмоўцамі ўдаецца наладзіць канструктыўны дыялог. Разам з тым у маёй працы нямала негатыўных сітуацый. Аднак я кіруюся правілам: усе ўзніклыя праблемы трэба пакідаць на працоўным месцы, не прыносіць іх дадому.

-- Якія якасці ў першую чаргу павінны быць уласцівыя следчым?

-- Акуратнасць, удумлівасць і пры гэтым -- дакладнае веданне і выкананне патрабаванняў закона. Менавіта ад нашай працы залежыць далейшы лёс чалавека: будзе ён пазбаўлены волі ці не, на які час, наколькі вялікі штраф пагражае за тое ці іншае правапарушэнне і г.д. У маёй практыцы здарыўся выпадак, калі за 10 рыбінак чалавек быў пакараны штрафам у 10 тысяч рублёў. Так склаліся абставіны: парушальнік выкарыстоўваў забароненыя прылады ў забаронены час, злавіў асабліва каштоўныя пароды рыб…

-- Наталля, у якой прафесіі, акрамя следчага, вы маглі б рэалізаваць сябе?

-- Мне вельмі блізкае выяўленчае мастацтва. З дзяцінства я захаплялася маляваннем, любіла ствараць скульптуры і шыць. Пасля заканчэння сярэдняй школы збіралася паступаць у Віцебскі дзяржаўны тэхналагічны ўніверсітэт, на спецыяльнасць дызайнера. Аднак, убачыўшы работы студэнтаў, засумнявалася ў сваіх здольнасцях. Ужо цяпер, успамінаючы той час, прыходжу да высновы, што гэта былі работы студэнтаў-выдатнікаў, якія вучыліся не адзін год. Напэўна, у мяне ўсё ж такі быў шанц паступіць.

Я ж пайшла па іншай сцяжынцы. Паступіла ў Полацкі аграрна-юрыдычны каледж. Падчас працы ў Бешанковіцкім раёне была ўдзельніцай добраахвотнай народнай дружыны. Затым атрымала прапанову працаваць у міліцыі. Так паступова і склалася мая кар’ера. Адзначу, што мне падабаецца працаваць з людзьмі. У нашай працы вельмі важна знайсці да чалавека індывідуальны падыход. Зараз я займаю пасаду старшага следчага Лепельскага раённага аддзела Следчага камітэта па Віцебскай вобласці, з’ўяюся маёрам юстыцыі.

Тэкст і фота: Васіль МАТЫРКА

На здымку: старшы следчы маёр юстыцыі Наталля Смажэўская