У далейшым намаганнямі нераўнадушных людзей, у прыватнасці ўраджэнца Юркоўшчыны Сяргея Седзіна і скульптара Аляксандра Гвоздзікава школе быў падораны бюст героя.
У выпусках нашай газеты №76 за 23 верасня і №91 за 15 лістапада ў публікацыях “Школа памятае пра баявы шлях героя” і “Бюст імя героя ў школе” пісалася пра вельмі важныя падзеі ў жыцці Старалядненскай базавай школы-сада. У пачатку навучальнага года ўстанове было прысвоена імя земляка, ураджэнца вёскі Занькі поўнага кавалера ордэна Славы Фёдара Занько. У далейшым намаганнямі нераўнадушных людзей, у прыватнасці ўраджэнца Юркоўшчыны Сяргея Седзіна і скульптара Аляксандра Гвоздзікава школе быў падораны бюст героя. Парыў душы Сяргея Сяргеевіча і Аляксандра Мікалаевіча быў адзначаны раённымі ўладамі.
Старшыня раённага Савета дэпутатаў Ігар Урбан уручыў скульптару Аляксандру Гвоздзікаву Ганаровую грамату, а Сяргею Седзіну – Падзяку раённага Савета дэпутатаў. Каменціруючы падзею, Ігар Урбан зазначыў:
— Хачу засяродзіць увагу на некалькіх важных момантах. Па-першае, прысваенне Старалядненскай школе імя поўнага кавалера ордэна Славы Фёдара Занько, іх земляка, будзе аказваць важны выхаваўчы эфект. Праца ў гэтым накірунку ўжо вядзецца ўсім педагагічным калектывам школы. Па-другое, бюст героя – гэта сімвал нашай памяці і пашаны яму, яго подзвігам, укладу ў вялікую Перамогу. Калі ж гаварыць пра ўручэнні, то заўважу, што яны адбываліся непасрэдна на працоўных месцах. Аляксандра Мікалаевіча я застаў у яго творчай майстэрні, а Сяргея Сяргеевіча – у адміністрацыі Віцебскага раёна электрасетак, дзе чалавек, ужо будучы на пенсіі, працуе. Для мяне было вялікім гонарам уручыць знакі павагі і пашаны такім актыўным, нераўнадушным людзям, сапраўдным грамадзянам Рэспублікі Беларусь.
Васіль МАТЫРКА.
На здымках: Ігар Урбан уручае Ганаровую грамату Аляксандру Гвоздзікаву ў яго творчай майстэрні, Падзяка раённага Савета дэпутатаў – Сяргею Седзіну(справа).
