У гады Вялікай Айчыннай вайны штодзённа па радыё па ўсёй тэрыторыі былога Савецкага Саюза перадаваліся зводкі Саўінфармбюро.
У гады Вялікай Айчыннай вайны штодзённа па радыё па ўсёй тэрыторыі былога Савецкага Саюза перадаваліся зводкі Саўінфармбюро, у якіх паведамлялася аб найбольш важных падзеях, што адбыліся за апошнія суткі на франтах барацьбы супраць нямецка-фашысцкіх захопнікаў. Усе чакалі навін з нецярпеннем, асабліва нашы землякі-лепяльчане, якія спадзяваліся на хуткае вызваленне роднага краю ад ворага. Гэтыя паведамленні Саўінфармбюро сталі выклікаць асаблівую цікавасць пасля таго, як 23 чэрвеня 1944 года пачалася знакамітая беларуская наступальная аперацыя “Баграціён”.
І вось, нарэшце, у зводцы быў ўпамянуты Лепель: “На працягу 25 чэрвеня на захад ад Віцебска нашы войскі, разгортваючы наступленне, фарсіравалі раку Заходняя Дзвіна на фронце 30 км і з баямі занялі больш за 150 населеных пунктаў. На ўсход ад Бешанковічаў нашы войскі перарэзалі шашу Віцебск-Лепель”.
Вялася гаворка аб нашым горадзе і ў паведамленні ад 26 чэрвеня: “На Аршанскім напрамку нашы войскі з баямі прасоўваліся наперад і авалодалі раённымі цэнтрамі Віцебскай вобласці — горадам Дуброўна, горадам і буйной чыгуначнай станцыяй Талачыно, перасеклі шашу, чыгункі Орша-Барысаў і Орша-Лепель”.
Зусім канкрэтна загучалі назвы населеных пунктаў нашых родных мясцін і бліжэйшага наваколля ў зводцы Саўінфармбюро ад 27 чэрвеня 1944 года: “На Лепельскім напрамку нашы войскі з баямі прасоўваліся наперад і авалодалі раённым цэнтрам Чашнікі, а таксама захапілі больш за 200 іншых населеных пунктаў, сярод якіх Усвея, Усая, Хоціна, Батукалава, Камень, Мядзвецк, Козанаўка, Лукомль і чыгуначныя станцыі Вятны, Чашнікі”.
І не магла не выклікаць вялікай радасці ў лепяльчан і жыхароў раёна наступная зводка Саўінфармбюро: “На працягу 28 чэрвеня на поўдзень ад Полацка нашы войскі, пераадольваючы супраціўленне і інжынерныя камунікацыі праціўніка, у міжазёрных дэфіле, вялі наступальныя баі, у ходзе якіх авалодалі раённым цэнтрам Віцебскай вобласці горадам Лепелем, а таксама занялі больш за 100 іншых населеных пунктаў, і сярод іх Чарніцы, Краснае, Зацечча, Зямцы, Замошша, Старое Лядна, Вялікае Поле”.
Мікалай ГАРБАЧОЎ.
На здымку: знакаміты дыктар Усесаюзнага радыё Юрый Левітан чытае чарговую зводку Саўінфармбюро.
