З пачатку года на Лепельшчыне адбылося сем пажараў, на якіх загінуў адзін чалавек. У адказ на гэтую трывожную тэндэнцыю работнікі МНС ініцыявалі маштабную прафілактычную работу, накіраваную на зніжэнне рызык узнікнення пажараў у жыллёвым фондзе, павышэнне культуры бяспекі жыццядзейнасці насельніцтва.
У дапамогу лепельскім ратавальнікам сёння прыбылі работнікі Віцебскага абласнога ўпраўлення МНС і правялі прафілактычную акцыю “Дом без пажару”. У рамках прафілактычных рэйдаў, наведваючы домаўладання, работнікі МНС давялі грамадзянам аператыўную абстаноўку, расказалі аб прычынах узнікнення пажараў і нагадалі аб неабходнасці захавання правілаў пажарнай бяспекі ў быце. Асаблівую ўвагу ўдзялілі дзіцячай бяспецы, ацяпляльным прыборам, а таксама недапушчэнню курэння ў месцах, прызначаных для сну. Пры наяўнасці пячнога ацяплення ў домаўладаннях ратавальнікі акцэнтавалі ўвагу на стане комінаў у паддашкавых памяшканнях.
Асаблівую ўвагу работнікі МНС удзялілі наяўнасці і працаздольнасці аўтаномных пажарных апавяшчальнікаў. Жыхароў інфармавалі аб неабходнасці перыядычнай замены элементаў харчавання, прыводзячы прыклады станоўчай спрацоўкі і выратавання людзей.
– Асноўная задача гэтага «выратавальніка» – падаць гукавы сігнал і абудзіць вас. Чалавек у сне не адчувае пахі, таму прачнуцца своечасова і паспець выратавацца вам дапаможа толькі ён. Для гэтага апавяшчальнік павінен быць усталяваны ў тых пакоях, у якіх вы спіце, – растлумачылі ратавальнікі.
Шэраг тэматычных навучальных мерапрыемстваў на тэрыторыі горада Лепеля правялі і работнікі цэнтру прапаганды.
З выхаванцамі дзіцячага сада № 8 яны адправіліся ў краіну Баламуцію, у якой вывучалі правілы бяспекі жыццядзейнасці і дзеянні ў выпадку пажару.
Не застаўся без увагі і працоўны калектыў гэтай дзіцячай установы. З імі ратавальнікі правялі гутарку па выкананні правілаў пажарнай бяспекі ў побыце і на працоўным месцы.
Далей “дэсант” прапагандыстаў накіраваўся ў сярэднюю школу №3. У цікавай і даступнай форме дзецям нагадвалі прычыны ўзнікнення небяспечных сітуацый і тыя правілы, якія дапамогуць іх пазбегнуць.
Пагутарылі на тэму бяспекі і з наведвальнікамі цэнтральнай пошты горада Лепеля. Небяспека выхаду на лёд, спраўнасць пячнога ацяплення, правілы эксплуатацыі электрапрыбораў, неабходнасць у домаўладаннях аўтаномных пажарных апавяшчальнікаў – гэтыя і многія іншыя тэмы былі асветлены ў ходзе гутарак з грамадзянамі.
Пажарна-прафілактычная работа – гэта адзін з ключавых кампанентаў у забеспячэнні бяспекі насельніцтва, а выкананне рэкамендацый ратавальнікаў і выкананне правілаў пажарнай бяспекі – залог спакойнага і бяспечнага жыцця ў кожным доме.
Источник: МЧС Беларуси
