У Лепельскім райвыканкаме адбылося чарговае пасяджэнне камісіі па справах непаўналетніх і каардынацыйнага савета па рэалізацыі Дэкрэта №18.
Удзельнікамі пасяджэння сталі старшыня камісіі па справах непаўналетніх Віктар Азаронак, намеснік старшыні камісіі Таццяна Часнакова, прадстаўнік раённай пракуратуры, іншых адказных службаў, а таксама суб’ектаў прафілактыкі.
На павестцы дня было разгледжана 20 пратаколаў. Адно з асноўных пытанняў, вынесеных на абмеркаванне, — разгляд інфармацыйнага ліста пракурора раёна аб стане законнасці і правапарадку на тэрыторыі Лепельскага раёна ў першым паўгоддзі бягучага года.
Як адзначыў у сваім выступленні Віталь Жыгімонт, за першае паўгоддзе бягучага года на тэрыторыі Лепельскага раёна зарэгістраваны тры злачынствы непаўналетніх, за аналагічны перыяд мінулага года — чатыры. У структуру злачыннасці непаўналетніх па-ранейшаму ўваходзяць злачынствы карыслівай накіраванасці. Гэта крадзеж маёмасці, крадзеж і адно злачынства ў галіне высокіх тэхналогій. У здзяйсненні злачынстваў удзельнічалі двое непаўналетніх, летась — шэсць.
Асноўным відам правапарушэнняў, якія ўчыняюцца на тэрыторыі Лепельскага раёна, па-ранейшаму з’яўляецца распіццё алкагольных напояў або з’яўленне ў грамадскім месцы ў стане алкагольнага ап’янення. Падобных злачынстваў на тэрыторыі раёна было здзейснена восем (у 2022 годзе — чатырнаццаць). Трэба адзначыць, што зніжэнне гэтага віду правапарушэння ў параўнанні з аналагічным перыядам 2022 года сведчыць аб актывізацыі ў названым напрамку прафілактычнай работы. Большасць непаўналетніх, якія ўчынілі правапарушэнні, з’яўляюцца навучэнцамі адной з устаноў раёна. Такім чынам, можэна зрабіць выснову, што дапушчаны пралікі ў прафілактычнай рабоце ва ўстанове адукацыі Лепельскага раёна. Варта таксама адзначыць, што большасць правапарушэнняў здзяйсняецца ў перыяд часу з 18 да 00 гадзін.
Неабходна звярнуць пільную ўвагу на занятасць вучняў у вячэрні час і знаходжанне іх без нагляду ў начны час сутак.
У першым паўгоддзі бягучага года пракуратурай раёна былі праведзены тры праверкі выканання заканадаўства аб непаўналетніх і моладзі. З іх адно — аб прафілактыцы і безнагляднасці правапарушэнняў, а таксама па адным — аб абароне правоў і законных інтарэсаў непаўналетніх, а таксама аб абароне правоў дзяцей-сірот, пакінутых без апекі бацькоў. Па выніках праверак унесены тры прадстаўленні, тры прадпісанні і чатыры пратэсты. Пятнаццаць асоб прыцягнута да дысцыплінарнай адказнасці.
Вынікі праверкі сведчаць пра тое, што ў дзейнасці ўстановы адукацыі ёсць факты невыканання патрабаванняў вышэйназванага заканадаўства, а таксама прысутнічаюць пэўныя арганізацыйна-практычныя недахопы, якія вядуць да парушэння патрабаванняў заканадаўства аб прафілактыцы правапарушэнняў, што негатыўна ўплываюць на эфектыўнасць выхаваўча-прафілактычнай работы.
Пытанні папярэджання падлеткавай злачыннасці, правапарушэнняў, безнагляднасці, п’янства і наркаманіі рэгулярна разглядаюцца на пасяджэннях райвыканкама, камісіі па справах непаўналетніх, у большасці — пры ўдзеле пракурора раёна. Гэта, вядома, у значнай ступені садзейнічае павышэнню аўтарытэту камісіі па справах непаўналетніх, значнасці рашэнняў, якія прымаюцца, і выкананню законнасці ў яе дзейнасці.
Фота: члены прэзідыума падчас пасяджэння
Тэкст і фота: Кацярына АГАПОНЬКА
