Плошчы зерневых і зернебабовых культур у дзяржаўнай сельскагаспадарчай установе “Лепельская сортавыпрабавальная станцыя” невялікія, адносна іншых сельгасарганізацый раёна – 519 гектараў.
Плошчы зерневых і зернебабовых культур у дзяржаўнай сельскагаспадарчай установе “Лепельская сортавыпрабавальная станцыя” невялікія, адносна іншых сельгасарганізацый раёна — 519 гектараў. Для параўнання: у КУВСГП “Лепельскае” — 1702 гектараў, у СВФ “Заазер’е” ААТ “Віцебскі мясакамбінат” — 3664 га. Аднак і збожжаўборачнай тэхнікі на сартастанцыі няшмат, усяго два камбайны. Атрымліваецца па 260 гектараў на машыну — нармальная нагрузка, разлічаная вытворцамі. У дзень прыезду карэспандэнта ў гаспадарцы было зжата крыху больш, як 40 працэнтаў плошчаў. У чым жа затрымка?
Адказ знайшоў адразу, як толькі зайшоў на мехдвор — абодва камбайны стаялі на рамонце. На першым механізатар Віталь Свістуноў мяняў рэмень прываду вентылятара. Здаецца, не вельмі вялікая паломка, але без яго нельга нават запускаць рухавік. Можа перагрэцца і тады адбудзецца нашмат большая паломка. Галоўная ж цяжкасць заключаецца ў тым, што на складзе сельгасарганізацыі таго рэменя не было, таму інжынер тэрмінова паехаў у г.Лепель, каб набыць яго ў спецыялізаванай краме.
У другім камбайне, на якім працуюць Яўген Шамшур з бацькам Сямёнам, сітуацыя нашмат больш складаная — выйшаў са строю транспарцёр. Паломка адбылася напярэдадні ўвечары, калі камбайнеры завяршалі чарговы працоўны дзень. Каб не стамляць чытачоў тэхнічнымі падрабязнасцямі, але даць некаторае ўяўленне пра маштаб, скажу, што новы корпус транспарцёра трэба заказваць непасрэдна на заводзе-вытворцы, а гэта значныя затраты фінансавых сродкаў і часу. У гарачую жніўную пару гэта не даравальна.
Нарэшце, адказныя работнікі сартастанцыі звярнуліся ў суседнія гаспадаркі і знайшлі запасны корпус транспарцёра. Хоць ён і былы ў карыстанні, але ў такой сітуацыі цалкам прыдатны. Яўген за лічаныя гадзіны яго ўстанавіў, на момант прыезду карэспандэнта мужчына ўстанаўліваў прывадны ланцуг. Паколькі камбайнер быў вельмі засяроджаны на працы, маім галоўным суразмоўцам стаў дырэктар раённай сортавыпрабавальнай сартастанцыі Андрэй Краўцоў.
— Якая сітуацыя складваецца на ўборцы? — спытаў у кіраўніка.
— Прызнаюся, вельмі напружаная. Ужо 23 жніўня, а мы не змаглі ўбраць палову сваіх плошчаў.
— У чым, на ваш погляд, галоўная прычына затрымкі жніва?
— Зношанасць тэхнікі. Абодва камбайны набыты сартастанцыяй больш за 10 гадоў таму. Кожны сезон тэхніка эксплуатуецца ў інтэнсіўным рэжыме. Натуральна, многія механізмы і агрэгаты не вытрымліваюць, выходзяць са строю, дае аб сабе ведаць і зношанасць металу. Паломкі на полі адбываюцца штодзень. Сёлета не было выпадкаў, каб абодва камбайны добра працавалі. Мы кожны год імкнёмся падрыхтаваць тэхніку належным чынам, набываем і мяняем некаторыя запчасткі, але ўсяго па фінансавых прычынах ахапіць не можам. Хацелася б набыць новы камбайн.
— Паралельна з уборкай трэба праводзіць і азімую сяўбу. Як тут ідуць справы?
— Таксама са значнымі цяжкасцямі. Праўда, яны выкліканы іншымі прычынамі, у першую чаргу спякотным надвор’ем. З-за сухмені глеба стала цвёрдай, дыскі і плугі з вялікай цяжкасцю заглыбляюцца ў яе, насенне без вільгаці ляжыць у глебе, не прарастаючы. Атрымліваецца супярэчнасць: для працягу і паспяховага завяршэння ўборкі патрэбна сухое сонечнае надвор’е, а для сяўбы — дождж.
— Якім чынам можна паскорыць уборку?
— Будзем звяртацца па дапамогу да суседзяў. Ведаю, што ў ААТ “Чарэйшчына” ўборачная кампанія блізіцца да завяршэння. Там на палях засталіся лічаныя гектары. Будзем звяртацца з просьбай, каб яны выдзелілі хаця б адзін камбайн з экіпажам.
На момант напісання публікацыі стала вядома, што абодва камбайны сортавыпрабавальнай станцыі адрамантаваны, выехалі ў поле. Па дапамогу прыйшоў камбайн з ААТ “Чарэйшчына”. Дзякуючы ўсім прынятым мерам, у гаспадарцы збажыны зжата больш, чым з паловы плошчаў, якія падлягаюць уборцы.
Тэкст і фота: Васіль МАТЫРКА.
На здымку: камбайнер Яўген Шамшур устанаўлівае ланцуг прываду механізма на сваім камбайне.