Няхай у сем’ях будзе спакой і любоў
Паслязаўтра вернікі ўрачыста і з вялікай радасцю будуць адзначаць адно з самых важных святаў – Уваскрэсенне Хрыстова. Па традыцыі напярэдадні гэтага светлага дня гутарым з пробашчам касцёла Святога Казіміра ксяндзом Уладзімірам Заянчкоўскім.
— Ксёндз Уладзімір, што нясе з сабой свята Уваскрэсення Хрыстова?
— Унутранае, глыбіннае значэнне свята — гэта душой падрыхтавацца да асэнсавання таго, што зрабіў для нас Сын Божы: як ён прыйшоў на Зямлю, як ён вучыў, прапаведаваў, пакутаваў і ўваскрос. Свята аб’ядноўвае мільёны людзей верай у надзею на вечнае жыццё і збаўленне ад бед і пакутаў.
— Раскажыце, калі ласка, як праходзіць Вялікі тыдзень і Пасхальны Трыдуум?
– У католікаў са святкавання Вербнай (Пальмовай) нядзелі распачаўся Вялікі тыдзень, які дае магчымасць належным чынам падрыхтавацца да важнага свята Змёртвыхпаўстання Езуса Хрыстуса, а таксама асэнсаваць падзеі, якія адбываліся ў Іерузалеме. Завяршаецца тыдзень Святым Пасхальным Трыдуумам, у які ўваходзяць Вялікія Чацвер, Пятніца і Субота. Падзеі i набажэнствы засяроджваюць вернікаў на ўспамінах мукі і смерці нашага Збаўцы Езуса Хрыста. Гэта дні асаблівага пакаяння і посту. Будзем таксама маліцца аб спакоі ў нашых сем’ях і ва ўсім свеце. Сёння — Вялікая пятніца Мукі Пана, дзень посту і жалобы ў касцёлах і дамах хрысціян. Літургія ў касцёле пачнецца а 18 гадзіне. У Вялікую Суботу касцёл «прабывае» каля труны Пана, разважаючы пра Яго мукуі смерць, чакаючы ў малітве і посце Яго ўваскрэсення. На працягу дня ў касцёлах не здзяйсняюцца Літургіі, толькі чытаюцца літургічныя гадзіны. У гэты ж дзень у касцёле ў 11, 12, 16, 17 і 18 гадзін будзе праводзіцца асвячэнне велікодных страў: яек, кулічоў і тварожных пасх.
Святая Імша Вігіліі Пасхальнай у суботу пачнецца а 22-й гадзіне. У нядзелю раніцай a 8-й гадзіне пачнецца Святая Імша Змёртвыхпаўстання Пана.
— Ксёндз Уладзімір, што нельга рабіць у гэтыя дні?
— Не варта наведваць забаўляльныя месцы. Нельга спяваць і танчыць, арганізоўваць масавыя мерапрыемствы. Нельга лаяцца з іншымі людзьмі, дапушчаць «брудных» думак, а таксама ўжываць зняважлівыя словы. Нельга адмаўляць тым, хто просіць.
— Як лепш правесці гэтыя дні?
— Трэба надаць увагу духоўнаму развіццю, маліцца і ўспамінаць пакуты Езуса Хрыстуса. Святары заклікаюць у гэты дзень мірыцца, асабліва калі хтосьці нядаўна пасварыўся з блізкім чалавекам, і дараваць ворагам. Трэба дапамагаць усім, хто мае патрэбу ў падтрымцы. Вядома, у Вялікую суботу трэба фарбаваць яйкі, пячы кулічы і пасхі, гатаваць мяса.
— Што б вам хацелася пажадаць парафіянам напярэдадні свята?
— Дарагія прыхаджане рымска-каталіцкай царквы, віншую ўсіх з надыходзячым светлым святам Вялікадня! Жадаю, каб Уваскрослы Хрыстос напоўніў усіх нас сваім Духам Святым, Духам радасці, любові надзеі. Няхай гэтыя вясновыя светлыя велікодныя дні дораць усім Божую ласку, умацуюць у сэрцах людзей любоў і дабрыню, прынясуць у дамы згоду і дабрабыт! Няхай у сем’ях жывуць любоў і спакой!
