Стала блізкай праца на зямлі

Аднак, прайшоў па раллі, паглядзеў -- і ўсё стала зразумела. Як аказалася, глеба пад нятоўстым слоем снегу зусім не прамерзла. Нядаўна на палетку расла кукуруза, пра яе нагадвалі толькі роўныя шэрагі рэшткаў сцяблоў, якія на зіму для перагнівання трэба было завярнуць у зямлю.

Ворывам займаўся механізатар філіяла “Баброва-Агра” Іван Бачароў. Трактар МТЗ-1523 з 3-корпусным плугам апрацоўваў невялікі палетак, магутныя “Кіраўцы” з шырэйшымі агрэгатамі былі занятыя на іншых, больш прасторных палях. Такая арганізацыя справы падалася разумнай і рацыянальнай: малую тэхніку больш эфектыўна выкарыстоўваць на кароткіх гонях, а энерганасычаную -- на доўгіх.

Іван Вітальевіч дазволіў праехаць разам з ім у кабіне трактара і распавёў пра сваю працу:

-- Напярэдадні пераворваў суседні ўчастак, ён ужо пакрыты снегам. З раніцы мне дадзена заданне пераараць цяперашні, мяркую да абеда ўправіцца.

-- А потым?

-- Салярка ў баках ёсць, мабільны тэлефон -- таксама. Кіраўнік патэлефануе, дасць указанне або ехаць на іншае поле, або на мехдвор.

Баброўскія палі засмечаны каменнем, некалькі даволі вялікіх выглядалі з-пад пласта глебы. Таму карпусы плугоў аснашчаны спецыяльнымі спружыннымі прыстасаваннямі, якія засцерагаюць лемяшы і іншыя дэталі ад паломак.

Глеба на полі цяжкая, гліністая, узгорыстая, да таго ж пакрыта слоем снегу, таму трактар слізгаў. Трактарысту было цяжка правесці роўную баразну, але ён вельмі стараўся.

-- Іван Вітальевіч, як даўно працуеце ў “Баброва-Агра”?

-- З чэрвеня. Раней шмат гадоў аддаў працы ў ААТ “Ладасна”, затым, пасля ліквідацыі таварыства, перайшоў у ААТ “Чарэйшчына”. З нядаўняга ж часу працую тут. Умовамі працы і заробкам задаволены.

-- Раскажыце, калі ласка, пра сваю сям’ю.

-- Разам з жонкай і дзецьмі жывём у вёсцы Курмялёўка. У нас падрастаюць дзеці Варвара, Мітрафан і Стэфанія, так што ёсць для каго працаваць, грошы зарабляць.

Менш, як дзесяць хвілін патрабуецца Івану Бачарову, каб праехаць вакол поля. Кароткімі гонямі зноў і зноў прырастае ворыва. Белая зямля становіцца чорнай, каб праз кароткі час зноў пакрыцца снегам. Дбайныя гаспадары выкарыстоўваюць любую магчымасць, каб восенню пераараць як мага больш палёў.

Тэкст і фота: Васіль МАТЫРКА

На здымку: па заснежаным полі едзе трактар з плугамі; Іван Бачароў