Больш за паўтара месяца, амаль ад часу правядзення раённых кірмашоў, не наведваў базар, таму і вырашыў выправіць сваю памылку.
Больш за паўтара месяца, амаль ад часу правядзення раённых кірмашоў, не наведваў базар, таму і вырашыў выправіць сваю памылку. Тым больш, гэтаму спрыяла надвор’е: тэрмометр паказваў 1-2 градусы марозу, але холад не адчуваўся. Мінулы базар па календары быў восеньскім, але па надвор’і — зімовым. Вось так у адзін дзень спалучыліся дзве пары года.
Яшчэ з ночы былі адчышчаны ад снегу асноўныя вуліцы, пешаходныя дарожкі і тратуары горада. Гэта давала дадатковы стымул кожнаму выйсці з дому ці кватэры. Прыйшоўшы ж на базар, адразу ўбачыў, шмо паміж гандлёвымі шэрагамі, на сельгаспляцоўцы, у па’дездах і падыходах снег таксама ўбраны. Было бачна, што работнікі камунальнай і дарожнай службаў папрацавалі ад душы.
Сельгаспляцоўка была амаль цалкам запоўненай, па ўсім яе перыметры стаялі машыны з разнастайным таварам — мясцовым і прывазным. Пачнём па парадку. Збожжа прапаноўвалася з пяці машын. Яно было прадстаўлена ў шырокім асартыменце. Можна было набыць пшаніцу, ячмень, авёс і нават кукурузу, не было хіба што толькі жыта. 10-літровае вядро аўсу прапаноўвалася па 5 рублёў, ячменю — па 5-6 рублёў, пшаніцы — па 6, а кукурузы — па 7. Апошняе зерне прадавалася толькі з машыны КУВСГП “Лепельскае”.
— Ці ахвотна набываюць збожжа? — задаю пытанне кіроўцу машыны.
— Ёсць цікавасць. У асноўным зерне купляюць рыбаловы-аматары для прыгатавання прынады. Адзін чалавек нядаўна адразу набыў тры мяхі кукурузы.
Бульбы было даволі шмат і мясцовай, і прывазной. За апошні час цана на другі хлеб крыху знізілася. Калі на кірмашах мясцовыя прадаўцы прапаноўвалі клубні ў сярэднім па 8 рублёў за вядро, то ў апошнюю нядзелю многія прасілі 7, а некаторыя пагаджаліся прадаць і за 6 рублёў.
З гародніны даволі шмат было капусты. Яе прадавалі не менш, як з 5 машын па 80-90 капеек за кілаграм. Па адной цане прапаноўваліся сталовыя буракі, морква і цыбуля мясцовага вырошчвання — 1,50 за кілаграм. Галоўку часнаку можна было набыць за 1 рубель.
Самым значным таварам на сельгаспляцоўцы ў мінулую нядзелю былі ўсё ж яблыкі мясцовага вырошчвання. Іх водар напаўняў пляцоўку, навяваў успаміны пра лета і адносіў у светлую пару дзяцінства. Пры гэтым цэны, варта адзначыць, былі вельмі прымальныя: яблыкі самай лепшай якасці прадаваліся па 1,50 за кілаграм, крыху горшыя — па рублі. Сартоў было прывезена шмат, пра кожны садаводы маглі расказваць гадзінамі, апісваючы іх вартасці: які больш салодкі, які — з кіслінкай, які лепей пусціць на сок, які — на павідла і гэтак далей.
Галоўнае змяненне ў малочным павільёне — некаторы рост цэн. Так, па-ранейшаму малако можна было набыць па 7 рублёў за 3-літровы слоік, а смятану — па 3,50 за паўлітра. Кошт кілаграма тварагу складаў 10 рублёў, сыру — 16, а масла — 21.
Цана на мёд не змянілася — 9 рублёў за паўлітровы слоік. А вось на яйкі канчаткова ўстанавілася цана ў 5 рублёў за дзясятак.
Мясны павільён вырашыў абмінуць і адразу скіраваўся на галоўную гандлёвую пляцоўку. Там самым актуальным таварам у нядзелю сталі… снегавыя рыдлёўкі! Гэта і не дзіўна пасля моцных снегападаў, калі раніцай і ўвечары гаспадарам трэба расчышчаць свае двары і праезды. Самую танную рыдлёўку, пластыкавую на драўлянай ручцы, убачыў у прыезджых гандляроў за 20 рублёў, самую дарагую — у іх жа — за 38. Адразу ўзгадаў, як яшчэ ў школе на ўроках працы мы выраблялі снегавыя рыдлёўкі з фанеры і абавязкова абабівалі лязо тонкай палоскай жалеза. Цікава, ці захаваліся такія ў гаспадароў?
Што яшчэ можа зацікавіць пакупнікоў у пачатку зімы? Вядома, зімовы абутак і цёплая вопратка. Зімовыя рабочыя боты, якія надзейна абароняць і ад марозу, і ад сырасці, каштавалі ад 35 да 75 рублёў. На камплекты цёплага адзення цэны таксама могуць істотна адрознівацца. Так, у адным з ралетаў касцюм са штаноў і курткі, у залежнасці ад матэрыялу і памеру, каштаваў ад 130 да 250 рублёў.
На завяршэнне абходу зайшоў у гандлёвую кропку рыбгаса “Навінкі”. Рыбаводы прывезлі таўсталобікаў па цане 5,70 за кілаграм, карпаў адборных — па 6,90 і амураў белых — па 7,70 рубля за кілаграм. Тавар быў настолькі папулярны, што, каб яго купіць, трэба было адстаяць у чарзе ад некалькіх хвілін да паўгадзіны.
Дэталёва вывучыўшы асартымент тавараў на рынку, вырашыў вярнуцца дадому.
Тэкст і фота: В. МАТЫРКА.
На здымку: адчышчаная ад снегу базарная плошча; чарга да рыбнай кропкі; Пакупнікі выбіраюць снегавую лапату
