Міжнародны дзень роднай мовы паклікаў у чытальную залу раённай бібліятэкі першакурснікаў 294-й групы ДУА “Лепельскі аграрна-тэхнічны каледж” на чале з выкладчыцай беларускай мовы і літаратуры гэтай навучальнай установы Вольгай Аляксандраўнай Бельскай.
На сустрэчу з імі прыйшлі член ГА “Саюз пісьменнікаў Беларусі”, празаік, паэт і журналіст Мікалай Гарбачоў і кіраўнік народнага літаратурна-музычнага клуба “Выток” раённага Дома культуры Аксана Захаронак.
Мікалай Гарбачоў коратка распавёў аб змесце сваіх чатырох кніг прозы “Таямніцы мінулага”, “Ліхалецце і стварэнне”, “Чалавек з ціхім голасам” і “Шлях да ісціны”, прачытаў два аўтарскія вершы “Лепельшчыне” і “Напрадвесні”, падзяліўся сваімі асабістымі ўспамінамі аб дзяцінстве і школьных гадах, якія правёў у адной з вёсак Лепельскага раёна, дзе застаў яшчэ амаль чыстую беларускую літаратурную гаворку ў паўсядзённым выкарыстанні аднавяскоўцаў.
У якасці падцвярджэння глыбокіх старажытных каранёў беларускай мовы, якія сягаюць у глыбіню тысячагоддзяў, Мікалай Гарбачоў прывёў словы вядомага рускага гісторыка і перакладчыка, сакратара Расійскай Акадэміі Навук, дырэктара дэпартамента Міністэрства народнай асветы Расіі Д.І. Языкова, які яшчэ ў 1836 годзе напісаў: “Сапраўдная беларуская мова ёсць вельмі цікавы помнік, які нашы навукоўцы павінны былі б старанна вывучаць, таму што ён многае тлумачыць у рускіх летапісах і ў філалогіі нашай мовы. Яго можна назваць бацькам вялікарасійскай гаворкі. Гэта верагодна тая самая мова, якой казалі ў Пскове і Ноўгарадзе пры варагах. Ухіленная своечасова ад уплыву мангалізма і дагэтуль не адчуўшая ўплыву вялікарасійскай гаворкі, яна захавала ў многіх адносінах свой старадаўні выгляд і характар, меней пацярпела ад формаў польскай мовы чым думаюць”. (Энцыклапедычны лексікон, Санкт-Пецярбург, 1836 год).
Аксана Захаронак праінфармавала прысутных аб шматграннай дзейнасці літаратурна-музычнага клуба “Выток” раённага Дома культуры, эмацыйна і натхнёна прадэкламавала высокамастацкія вершы члена ГА “Саюз пісьменнікаў Беларусі”, паэтэсы Святланы Якубоўскай “Сцяг Айчыны маёй” і “Дакрануся да слова –- яно зазвініць…”, а таксама пазнаёміла аматараў паэтычнай творчасці з шчымлівымі вершаванымі радкамі такіх вядомых мясцовых талентаў як Соф’я Несцярук і Мікалай Яршоў.
Выклікала вялікую цікавасць у юнакоў і дзяўчат, прывяла да змястоўнай дыскусіі, ажыўленага абмену думкамі і арганізаваная ў ходзе сустрэчы краязнаўчая віктарына пад назвай “Край мой родны –- Лепельшчына”.
Прыемным заключным акордам адбыўшайся літаратурна-пазнавальнай імпрэзы стаў сумесны прагляд на вялікім маніторы камп’ютара каляровага відэароліка вельмі папулярнай зараз эстраднай песні “Беларуская мова” ў выкананні вядомага вакальна-інструментальнага ансамбля “Дразды”.
Мікалай АЗЁРНЫ.
