За шматгадовую плённую працу, значны асабісты ўклад у развіццё АПК, дасягненне высокіх вытворчых паказчыкаў медаля “За працоўныя заслугі” ўдастоены 23 чалавекі ў нашай краіне, сярод якіх і машыніст экскаватара дзяржаўнага прадпрыемства “Лепельскае ПМС” Ал
За шматгадовую плённую працу, значны асабісты ўклад у развіццё АПК, дасягненне высокіх вытворчых паказчыкаў медаля “За працоўныя заслугі” ўдастоены 23 чалавекі ў нашай краіне, сярод якіх і машыніст экскаватара дзяржаўнага прадпрыемства “Лепельскае ПМС” Алег Алецкі.
Адпаведныя Указ і распараджэнне падпісаў 27 сакавіка Кіраўнік дзяржавы Аляксандр Лукашэнка.
Як вядома, меліярацыя – галоўная задача нашай дзяржавы ў пытанні ўрадлівасці зямель. Больш за трэць сельскагаспадарчых угоддзяў Беларусі знаходзяцца на асушаных балотах. Ад таго, як спецыялісты гэтай сферы падтрымліваюць у спраўным тэхнічным стане меліярацыйныя сістэмы, залежыць ураджай сельгаспрадпрыемстваў. Задача меліяратараў — даглядаць зямлю, праводзіць рэканструкцыю, рамонт і абслугоўванне меліярацыйных сістэм, каб жывёла была накормлена, а збожжа мелася ў дастатку.
Не маглі такую ўзнагароду пакінуць па-за ўвагай і накіраваліся да Алега Іванавіча прама на аб’ект за вёскай Гарадчэвічы, дзе ён рупіўся на сваім жалезным коні — гусенічным экскаватары KOMATSU японскай вытворчасці.
Пакуль ехалі на “Ніве” разам з прарабам Аляксандрам Ковалем, пацікавіліся пра нашага героя публікаці.
— 20 гадоў працую разам з Алегам Іванавічам і магу пра яго сказаць толькі самыя лепшыя словы, — кажа мужчына. — За гэты перыяд ён зарэкамендаваў сябе адказным i дысцыплінаваным спецыялістам, валодае вялікім вопытам работы у меліярацыйнай галіне. У сваей працы дабіваецца высокіх вынікаў, старанны, умее планаваць сваю працу. Не дапускае канфліктных сітуацый у калектыве.
Як толькі прыехалі на аб’ект “Рэканструкцыя меліярацыйнай сістэмы “Новы шлях” Лепельскай сортавыпрабавальнай станцыі”, убачылі вялікае поле, дзе спілена шмат кустоў і часткова ўжо выкарчаваны.
— І гэта ўсё зрабіў адзін экскаватаршчык? — пытаюся.
— І гэта, і шмат іншага. Калі з вамі ехалі па трасе, бачылі добраўпарадкаваныя адкосы дарогі? Гэта таксама праца рук Алега Іванавіча і яго экскаватара.
А вось і герой нашай публікацыі ў добрым настроі выходзіць да нас з кабіны, вітаецца. Віншуем мужчыну, а ён у адказ кажа:
— Атрымаць такую высокую адзнаку сваёй працы вельмі ганарова. З меліярацыяй я звязаў свой лёс выпадкова, але назаўжды. Выйшла так, што менавіта гэтая прафесія стала сэнсам жыцця.
— Транспарт у вас магутны і, бачна, сучасны…
— Так, на сучаснай тэхніцы працаваць значна прасцей, — усміхаецца.
Аднак мы разумеем, што без майстэрства і прафесіяналізму на любой найноўшай сістэме не будзе выніку. Павінны быць яшчэ вопыт і клапатлівыя адносіны да працы кіроўцы магутнага сродку.
Агульны стаж работы Алега Іванавіча складае 43 гады, стаж работы у Лепельскай ПМС — 34 гады. Сваю працоўную дзейнасць пачаў ў 1979 годзе. 3 кастрычніка 1988 года працаваў спачатку памочнікам машыніста экскаватара, а с кастрычніка 1990 года быў пераведзены машыністам экскаватара. B 2015 годзе асвоіў новы від тэхнікі – імпартны гусенічны экскаватар KOMATSU японскай вытворчасці. Замацаваную тэхніку мужчына, як клапатлівы гаспадар, заўсёды ўтрымлівае ў спраўным стане, своечасова праходзіць тэхнічнае абслугоўванне і тэхнічны агляд.
За высокія вытворчыя паказчыкі Алег Іванавіч узнагароджваўся Ганаровымі граматамі каммунальнага ўнітарнага прадпрыемства па будауніцтве і эксплуатацыі меліярацыйных і водагаспадарчых сістэм “Вітебскмеліяводгас”, Лепельскага раённага выканаўчага камітэта — колькасць, напэўна, і не злічыць. Акрамя гэтага, узнагароджаны Нагрудным знакам “Ганаровы меліяратар” дэпартамента па меліярацыі і воднай гаспадарцы Міністэрства сельскай гаспадаркі і харчавання Рэспублікі Беларусь.
Апошнія гады мужчына знаходзіцца на лідзіруючых пазіцыях сярод машыністаў экскаватараў меліярацыйных прадпрыемстваў Віцебскай вобласці. Па выніках працы за 2018, 2019 і 2020 гады прызнаваўся пераможцам сярод машыністаў экскаватараў Віцебскай вобласці і заносіўся на абласную Дошку гонару камунальнага унітарнага прадпрыемства па будаўніцтве і эксплуатацыі меліярацыйных і водагаспадарчых сістэм “Віцебскмеліяводгас”.
Вядома, за 30 гадоў значных аб’ектаў было нямала і ўсіх іх не пералічыць, але свой унёсак у якасць земляў нашага раёна мужчына зрабіў практычна ў кожным сельгаспрадпрыемстве. Даводзіцца працаваць не толькі ў Лепельскім раёне, але і ў іншых рэгіёнах вобласці — геаграфія камандзіровак шырокая.
Як адзначыў дырэктар прадпрыемства Уладзімір Домась, Алег Іванавіч — заўсёды патрабавальны да сябе, тактоўны ў калектыве, з’яуляецца прыкладам для калег і настаунікам для молодзі, карыстаецца заслужаным аўтарытэтам і павагай. Заклад вырашэння пастаўленых задач — высокакваліфікаваныя кадры. Менавіта такім і з’яўляецца Алег Алег Іванавіч, бо не проста працуе, а і ўкладвае ў працоўную дзейнасць досвед, душу і сэрца.
Пасля працоўнай дзейнасці Алег Іванавіч вяртаецца дадому да каханай жонкі, з якой ужо шмат гадоў жывуць разам у шчасці і клопатах. Дачка пасля заканчэння медкаледжа працуе ў Мінску. У Алега Іванавіча ўжо падрастаюць двое ўнукаў Цімафей і Мікіта, якія з задавальненнем прыязджаюць да дзядулі ў госці.
Наталля Храпавіцкая.
