Марыя Сездзіна нарадзілася ў вёсцы Чарніца вясной 1941 года. Дзіцячыя і юнацкія гады прайшлі ў вёсцы Паташня.
Марыя вельмі рана вызначылася з будучай прафесіяй: яна абавязкова будзе настаўніцай ці выхавальнікам у дзіцячым садку. Прыкладам для дзяўчыны была яе родная цёця Феня Балотнік, якая працавала настаўніцай пачатковых класаў у Свядзіцы. Скончыўшы ў Свядзіцы восем класаў, Марыя працягвала вучобу ў Свядскай сярэдняй школе. Пасля заканчэння школы Марыя не змяніла сваёй мары і калі да здзяйснення задуманага, здавалася, заставаўся адзін крок, паступае вучыцца ў сельскагаспадарчы тэхнікум у Полацку.
Марыя кінула вучобу ў тэхнікуме і з сяброўкай паехала ў Камышын. Вучыцца трэба было адзін год, пасля якога навучэнцы гарантавана забяспечваліся працай з дастойнымі заробкамі. Скончыўшы вучылішча два гады працавала на фабрыцы. Праца была лёгкая, чыстая, грашовая. Магчыма і засталася б, але мама папрасіла вярнуцца дадому.
Вярнуўшыся ў Паташню Марыя вырашыла здзейсніць дзіцячую мару – стаць настаўніцай. У 1965 годзе, пасля заканчэння Полацкага педвучылішча, Марыя пачала свой працоўны шлях у Велеўшчынскай васьмігодцы ў якасці настаўніцы пачатковых класаў. Затым выкладала ў Свядзіцкай васьмігодцы рускую мову і літаратуру. Завочна вучылася ў Вялікалуцкім педінстытуце. Пасля закрыцця ў 1974 годзе школы ў Свядзіцы працавала некалькі год у Слабадзе, а потым з сям’ёй асталяваліся ў Лепелі. Давялося Марыі Ясонаўне папрацаваць і выхавацелем у дзіцячым садку, настаўнікам і выхавацелем у школе-інтэрнаце. Апошнія некалькі год перад пенсіяй працавала ў Зялёнкаўскай пачатковай школе.
Настаўнікамі сталі і двое дзяцей Марыі Сездзінай: Алег – выкладчык фізічнай культуры ў Лепельскім аграрна-тэхнічным каледжы, Вольга працуе музычным работнікам у Мінску.
Сваім жыццём Марыя Ясонаўна задаволена. Жыве з сынам Алегам у дыхтоўным прыватным доме на ўскрайку Лепеля. Не забываюць бабулю дзеці і ўнукі, часта наведваюцца ў госці.
Прыміце самыя сардэчныя віншаванні з Вашым 85-гадовым юбілеем! Гэта дата — сведчанне мудрасці, жыццёвай устойлівасці і велізарнай душэўнай цеплыні. Жадаем Вам захоўваць светлы аптымізм, адчуваць пастаянны клопат блізкіх и няхай жыццё радуе добрымі сустрэчамі і цяплом сямейнага круга.
Валерый Тухта.
