Ужо шмат гадоў спажыўкааперацыя прымае ад насельніцтва сельскагаспадарчую прадукцыю, якая вырошчваецца ў асабістых падсобных гаспадарках ці на дачы, другасную сыравіну і лясныя дары ў летні перыяд.
Ужо шмат гадоў спажыўкааперацыя прымае ад насельніцтва сельскагаспадарчую прадукцыю, якая вырошчваецца ў асабістых падсобных гаспадарках ці на дачы, другасную сыравіну і лясныя дары ў летні перыяд. Лепельскім філіялам Віцебскага абласнога спажывецкага таварыства закупляецца больш за 30 відаў сельскагаспадарчай прадукцыі і рознай сыравіны. Пік нарыхтоўчай работы прыпадае на верасень-кастрычнік.
Як адзначаюць жыхары сельскіх населеных пунктаў, перыяд нарыхтовак для іх — чаканы спосаб павелічэння грашовых даходаў. Закупачная цана ў нарыхтоўчых пунктах кожны год мяняецца, бо фарміруецца пад уплывам попыту і прапановы.
У гэтым годзе многія атрымалі неблагі ўраджай сельгаспрадукцыі на сваіх прысядзібных надзелах і шукаюць пакупнікоў.
Мы вырашылі зазірнуць у нарыхтоўчы пункт, каб даведацца пра закуп лішкаў гародніны і садавіны. Начальнік аддзела нарыхтовак Віктар Авяр’янаў паведаміў, што на дадзены момант прымаюцца яблыкі-апад, якія потым накіроўваюцца на Полацкае прадпрыемства “Вінны майстар”, якое працуе пад кіраўніцтвам Віцебскага абласнога спажывецкага таварыства. На момант візіту карэспандэнта яблыкі прымаліся па 20 капеек за кілаграм. У гэтым сезоне ў Полацк ужо адвезлі больш за 180 тон сакавітых пладоў.
Арганізавана і выязная нарыхтоўка, калі прама на месцы прадукцыя ўзважваецца і робіцца разлік.
Разам з нарыхтоўшчыкам Ірынай Навамейскай і кіроўцам Валерыем Стэльмахам мы пабывалі ў аграгарадку Старое Лядна. Трэба сказаць, у гэтым населеным пункце Лепельшчыны, у адрозненне ад іншых, заўсёды багаты ўраджай яблыкаў.
Як толькі жыхары ўбачылі транспарт філіяла, адразу пачалі выносіць на вуліцу ёмістасці з сакавітымі пладамі. На цыферблаце вагаў – 56 кілаграмаў з двух мяхоў, гэта значыць у адным — 23 кілаграмы.
— Прыкладна 6 рублёў атрымліваецца за адзін мяшок, — падказвае мне Ірына Анатольеўна.
Пачалася нарыхтоўка ў стабілізацыйны фонд, дзякуючы якому ў міжсезонны перыяд у беларускіх магазінах можна набыць агародніну і садавіну айчыннай вытворчасці па прымальных цэнах. Для гэтага ў насельніцтва будзе закуплена 60 тон бульбы, 50 тон цыбулі, па 10 тон буракоў, морквы і яблыкаў. Бульба, напрыклад, прымаецца па 30 капеек за кілаграм.
Для даведкі. Па звестках Мінсельгасхарча, усяго ў міжсезонны перыяд – 2023/24 плануюць закласці 24,3 тысячы тон яблыкаў.
У нарыхтоўчую сістэму Лепельскага філіяла ўваходзіць 5 раёнаў.
Прайшоўшы па тэрыторыі і зазірнуўшы ў памяшканні, мы ўбачылі, што да перыяду нарыхтовак у Лепельскім філіяле падрыхтаваліся добра.
У горадзе працуюць 3 нарыхтоўчыя пункты, акрамя гэтага яблыкі прымаюць у вясковых крамах. У кожным магазіне ёсць куток нарыхтоўшчыка, дзе ўказаны закупачныя цэны, а таксама тэлефоны адказных работнікаў на выпадак спрэчных пытанняў. За здадзеную прадукцыю можна адразу ў краме набыць тавар.
На размеркавальных складах Лепельскага філіяла з пачатку лета прымаюць розную сельгаспрадукцыю ад насельніцтва, якая потым накіроўваецца ў магазіны і пункты грамадскага харчавання філіяла. Так, напрыклад, у гэтым сезоне прымалася не толькі звыклая гародніна, такая як памідоры і агуркі, а нават баклажаны.
Хочацца адзначыць, што ў Лепельскім філіяле сёння зацікаўлены ў тым, каб гародніна і садавіна, якія закупляюцца, былі якаснымі і без нітратаў, а таксама мелі таварны выгляд і адпавядалі пэўным стандартам. Таму ўвесь працэс строга кантралюецца спецыялістам па якасці.
Акрамя гэтага, людзі маюць магчымасць не толькі здаваць прадукцыю, але і самастойна прадаваць яе на рынку, што многія і робяць.
Наталля ХРАПАВІЦКАЯ
